PORMAL nang binuo ng Kamara ang isang 11-member “powerhouse” prosecution team na haharap sa Senado para sa nakatakdang impeachment trial ni Vice President Sara Duterte.
Sa sesyon ng Kamara, inaprubahan ang mosyon ni Las Piñas Rep. Mark Anthony Santos para italaga bilang opisyal na prosecutors ng Kamara ang mga mambabatas na bihasa sa larangan ng batas.
Pinamumunuan ang prosecution panel ni Batangas 2nd District Rep. Gerville ‘Jinky Bitrics’ Reyes-Luistro, chairperson ng House Committee on Justice.
Kabilang din sa prosecution team sina Mamamayang Liberal Party-list Rep. Leila de Lima, dating Justice secretary; Akbayan Party-list Rep. Chel Diokno, kilalang human rights lawyer at dating dekano ng DLSU College of Law; Manila 3rd District Rep. Joel Chua, chairperson ng Committee on Good Government and Public Accountability; at Bicol Saro Party-list Rep. Terry Ridon.
Kasama rin sa panel sina San Juan Rep. Ysabel Maria Zamora, Assistant Majority Leader; Cagayan de Oro 1st District Rep. Lordan Suan; Bukidnon 2nd District Rep. Jonathan Keith Flores; Iloilo 3rd District Rep. Lorenz Defensor; 1-Rider Party-list Rep. Ramon Rodrigo ‘Rodge’ Gutierrez; at Dinagat Islands Rep. Arlene ‘Kaka’ Bag-ao.
Binigyang-diin ng Kamara ang matinding track record ng mga miyembro ng panel, kabilang si De Lima na napabilang sa “100 Most Influential People” ng Time Magazine at si Diokno na nagsilbing private prosecutor sa impeachment trial ni dating Pangulong Joseph Estrada.
Ayon kay Luistro, hindi lamang tungkol sa numero ang pagbuo ng prosecution panel kundi sa pagtitiyak na masusunod ang tamang proseso sa ilalim ng Konstitusyon.
(TINA MENDOZA)
112 
